Сб 18.01.2020, 12:15                                                                                                                                            Регистрация Вход


Меню сайта

Краеведение

Наш опрос
Литературу какого жанра Вы предпочитаете?
Всего ответов: 59

Опрос
Как Вы оцениваете качество услуг в библиотеке?
Всего ответов: 22








Главная » 2016 » Апрель » 12 » Уэмше марий ялым моктен мурышо писатель Георгий Ефрушлан - 100 ий
12:14
Уэмше марий ялым моктен мурышо писатель Георгий Ефрушлан - 100 ий

Георгий Ефруш (Георгий Захарович Ефремов) - 10 апрель 1916 ийыште Морко кундемысе Макарсола ялеш шочын. Ачаже, Ефремов Захар Ефремович ялысе туныктышо улмаш. Аваже, Никифорова Матрена Никифоровна, тыглай кресаньык пашам ыштыше ÿдырамаш лийын. 8 ияш рвезе шинчымаш корным Горельский кандашияш школышто туналын. Литература корныш лекташыже эн ончычак монгысо еш илыш йöным ышта. Ачаже, Ефремов Захар Ефремович, историй ден литературым йоратен, руш писатель-влакын возымыштым шуко лудын, Георгийым творческий корныш шогалаш кумыланден шоген. 1933-1934 ийлаште Г.Ефрушын икымше произведенийже-влак шочыт, Морко районысо «Колхоз вий» тыгак «Рвезе коммунист», «Марий коммуна» газетлаште савыкталтыт. Йошкар-Олаште Г.Ефруш сылнымут кружокыш коштеш. Олык Ипай, Казаков Миклай, Осмин Йыван, Анатолий Бик, Чалай Васлий да моло самырык писатель дене палыме лиеш. Паша корно. 1936 ийыште «Ямде лий» газет редакцийыште ыштен. Возымо мастарлыкым вияндаш шинчымашым нöлташ кÿлын, садлан Г.Ефруш тунемаш тыршен. 1934 ийыште Морко медрабфакым тунем лектеш, вара Марий пединститутын литература факультетышкыже тунемаш пура. 1937 –ше ий гыч 1939 ий марте Медведево районысо Цибикнур кыдалаш школышто марий йылмым да литературым туныктен. 1939-ше ий гыч 1940 ий марте МарНИИн наука пашаенже лийын. Г. Ефруш писатель семын писын кушкын. 1931 ий гыч туналын 1940 ий марте шуко ойлымашым, пьесым, очеркым да почеламут-влакым воза. Эн сай ойлымаш ден очеркше сар деч ончыч посна сборник денат лектыныт. Г.Ефрушын прозыжо – ныжылге кумылан, лиризм шулышан. Уста писательын пьесыже-влак: «Ешем», «Тайра», «Эныремышвот», «Тушманын кышаже» марий драматургийым кугун пойдареныт. Тудо у книгалан рецензийым, рвезе автор-влакын мурпаша корнышт нерген статьям кӱрылтде возен шоген. Возымыжо «Марий коммуна», «Рвезе коммунист», «Ямде лий», «Ленин ой» газетлаш печатлалтын. «Шошо» сборникыште ойлымаш, очерк, статья, пьесе да почеламут-влак печатлалтыныт. Автор шке произведенийже-влак гоч утларакшым колхоз илыш нерген каласкален. Кö пашам йöратен, нунын дене кугешнен, а йолагай-влакым койдарен. Тудо 7-8 ий жапыште 20 утла очерк ден ойлымашым, почеламутым, пьеса-влакым савыктен луктын. Но 1941 ий 7 июльышто самырык писательын ÿмыржö кÿрылтын. Вуртем кундемын уста эргыже Г. Ефрушым мемнан кундемыште илыше калык огеш мондо. Теният, 9 апрельыште 100ияш лÿмгечыжлан пöлеклалтше Досметкино ялыште верланыше библиотекыште кугу пайрем эртаралте. Тиде вашлиймашыш ял калык дене пырля, Йошкар-Ола гыч Георгий Ефрушын кугу ÿдыржö Иванова Лина Георгиевна, Вениамин шольыжын Звенигово ола гыч Валерий, Нуж-Ключ гыч Георгий, Йошкар-Ола гыч Виталий эргышт, Морко гыч Эльвира удыржо, родо тукымышт толыныт ыле. Тыгак тышке Шенше ял шотан администрацийын вуйлатышыже Иванова Полина Сергеевна, Нуж-Ключ школын туныктышыжо-влак Яшмурзин Юрий Александрович да Арсланова Людмила Александровна лийыныт. Кажныже шке шарнымашыштым каласкалышт, презентаций гочын тÿрлö фотографийым ончышт. Горельский школын онычсо туныктышыжо, ялысе активистка Елизавета Викторовна Алексеева да Уртем Варангужын библиотекарьже Семенова Елена Сергеевна Георгий Ерушын илыш корныж дене палдарышт, а Елизавета Викторовна артист семынак Ефрушын «Пытартыш единоличник» ойлымашыжым лудын пуыш. Россий писатель ушемын членже Егоров Яков Михайловичат писательым поро мут дене шарналтыш. Пайремым Вуртем могырым уста мурызыжо-влакат сорастарышт. Ме кажныже шкенан землякна дене кугешнена.



Иванова Ж.Н., Морко рудо книгагудын пашаенже.

Просмотров: 353 | Добавил: Дмитрий | Теги: библиотека, книга, Ефруш, чтение, п. Морки, писатель | Рейтинг: 0.0/0
Всего комментариев: 0
Имя *:
Email *:
Код *:


Вход на сайт



   

              


           
      


 

  

  

   

   

      

    

    

      

    

            

     
 
  

   

VKONTAKTE
Моркинская библиотека


        

         

© МБУК «Моркинская ЦБС» 425120, Республика Марий Эл, Моркинский район, пгт. Морки, Советская, 7

Телефон: 8(83635)9-17-87; e-mail biblmorki@yandex.ru    
Copyright MyCorp © 2020