2019 ий – Россий Президент Владимир Путинын увертарымыж почеш Театр идалыклан шотлалтеш.

Морко рӱдӧ книгагудышто Театр идалык теле тылзын 20-шо кечыштыже «Уло мом шарналташ» лӱман мероприятий дене почылтын.

Краеведений сектор пашаеҥ-влак тиде мероприятийлан чот ямдылылтыныт: республикыштына улшо чыла театр нерген журнал да книга выставкым погымо, Морко калык театрын тӱрлӧ спектакль гыч кучылтмо ӱзгарым, артист-влакын чийыме вургемыштым, икманаш, атрибут ден декораций-влакым ончыктымо.

Пайрем мероприятийыш Морко калык театрын тӱҥ режиссёржо Анна Якушева, декораторжо Александр Филатов да йоча театрыш коштшо изи артист-влак толыныт.

Ончаш толшо-влаклан книгагудын поро йолташыже, марий йылме да литературым туныктышо Софья Васильевна Никитина Морко калык театр нерген презентацийым ямдылен. Александр Филатов йоча-влаклан артистын сценыште веле огыл, кулис шенгелнат спектакльлан ямдылалтме нерген каласкалыш, тыгак район мучко спектакльым ончыкташ миен кошмышт нерген ойлыш. А книгагудо пашаеҥ-влак йоча-влаклан театр нерген викториным эртарышт.

Йоча образцовый театрын изи артистше-влак уло усталыкыштым пыштен «Антошка-гармошка» йомак гыч ужашым модын ончыктышт. А пашан ветеранже-влак Иванов Ким Александрович ден Кузьмина Галина Васильевна йоча-влаклан шке шонымо почеламутыштым лудын пуышт.

Икманаш, Театр идалыкым почмо мероприятий кажнын чоныштыжо волгыдо да куан кумылым коден. Книгагудо-пашаеҥ-влак Театр идалык мучко Морко районышто шочын-кушшо да театр дене могай-гынат кылым кучышо еҥ-влак нерген дайджестым ямдылаш сӧрышт.