«Морко памаш» краевед клубын 3-шо погынымашыже келге кышам кодыш. Ӱярня тылзын 18-ше кечын марий сылнымутым, поэзийым йӧратыше-влак, шукерте огыл кӱйын лекше, Татьяна Пчёлкинан «Илыш тул» книга презентаций дене палыме лийыч. «Кечыйол гай волгыдым шижам» лӱман погынымашыш, Морко кундемын ӱдыржӧ, вич почеламут сборникын авторже, у книгаже дене шкеак палдарыш. Тиде произведенийыш автор, ойлымаш, илыш-сӱрет ден очерк-влакым пуртен. Залыште улшо лудшо-влак, Татьяна Пчёлкинам, лӱмлӧ айдеме дене палыме лиймыштлан, устан, лывырге сылнымут йылме дене возен моштымыжлан, тауштымо мутым каласышт.
Ӱжмӧ уна-влак кокла гыч, Наталия Никифирова «Торасе шӱдыр» почеламут сборникше дене палдарыш. Авторын ятыр почеламут корнылажым мурышко савырненыт да «Марий Эл» радиошто йоҥгалтарат. Наталия Александровнам шуко гана Морко сценыште веле огыл, Марий Эл Республикысе мыскарче мастар семын ужаш логалын. Тиде вашлиймашат, оҥай, калык чоныш шыҥдаралтше ой-влак деч посна ыш эрте.
Елена Григорьева, Наталья Иванова, Инна Алексеева самырык, поэзийым йӧратыше-влак, кеч-могай: шочмо кече, сӱан але иктаж пайремыш каят гын, еҥын кӱктымӧ саскаж гыч саламлымашан мутым огыт шолышт, шке шӱм-чон гыч шолын лекше сылнымут аршашым пӧлеклымышт нерген каласышт.
Марина Васильева шке шотан серызе манына гын, йоҥылыш она лий. Тудо илышысе сӱретым шке пӱсӧ умдыж дене почеламут гоч, туге почын ончыкта, лудшым чын илыш-верч шонаш тарата.
Галина Васильевна книгагудо пашаеҥ-влакын ик эн ончыл лудшына, чыла вере шке кумылын полшен шога, кеч-могай мероприятий кӱлеш годым почеламутымат лудын пуа, мурымат муралта, эн тӱҥжӧ «Тулык ватын ӱдыржӧ» книган авторже.
Икманаш, тиде погынымашыш Морко районын шочмо марий йылмына дене возен, марла книгам, газетым лудын, лӱдын вожылде, сылнымут поянлкым вияҥдыше-влак чумыргеныт.