15-16 мартыште Морко рӱдӧ книгагудын пашаеҥже-влак да «Морко памаш» клубын участницыже Кузьмина Галина Васильевна икымше номеран Морко школын 10-шо ден 11-ше классыште тунемше-влаклан поро, сылнымут шӱлышан «Чевер тӱня-кугу поэме» шарнымаш шагатым эртарышт. Тидыжлан амалжат кугу – Олык Ипайын (Ипатий Степанович Степанов) шочмыжлан 110 ий.
Мероприятий жапыште вӱдышӧ-влак Олык Ипайын илыш-корныжо, усталык пашаж нерген каласкалышт, сборникше-влак дене палдарышт, «Комсомолын мурыжо», «Тойметсола» почеламут-влакым йӱкын лудыч. А тунемше-влак, келшыше почеламутым ойырен налын, класс ончылно сылнын йоҥгалтарышт. Галина Васильевна «Теле» почеламутым лудын да «Муралтена мо вара» муро дене вашлиймашым сылнештарен. Александрова Людмила, Иванова Олеся, Кузьмина Галина «Пире» йомакым мастарын модын ончыктышт да «Яндиар» поэмым, «Айдар» йомакым роль дене лудыч.
Вашлиймашын тӱҥ шонымашыже – самырык-влакым поэзий дене палдараш, тудын деке шӱмаҥдаш. Ӱшаныме шуэш, кызытсе йоча-влак коклаште Олык Ипай гаяк чолга, мастар почеламутчо-влак ешаралтыт.